Gustavo (nome ficticio para protexer o seu anonimato) exerce as funcións de técnico de iluminación e sonido. En realidade, poderíamos dicir que é un home para todo. Criouse no barrio de Petare, na periferia de Caracas, e tivo a sorte de poder chegar a Europa hai case vinte anos. Despois de pasar por varias cidades españolas, afíncase en Vigo, onde tiña unha curmá, recentemente falecida. Chegamos a coñecernos pouco antes do inicio do curso, por razóns que non importan, e durante uns meses estará connosco facendo as prácticas dunha formación específica en estruturas converxentes para unha modelización fiable das pautas que perpetúan os valores endémicos irrenunciables na construción das identidades contemporáneas, aplicada a iluminación escénica.

Un orgullo telo connosco; algún día daremos contas de historias verdadeiramente incribles que nos ten contado.

A verdade tamén se inventa.