Os méritos outórganse desde fora. Unha pode achar que é a Rainha da Noite ou sentirse da
caste dos poètes maudits e incomprendidos alla de Vigny ou Verlaine, mas os méritos danse desde un
exterior, son heterónomos. No mercado de almas e corpos da comunidade de chalados que é a
sociedade do capitalismo cibernético eses méritos preténdense claros canto que estão certificados. Pois
ben, aí vai algunha cousa: Doutorando en Historia da Arte; Pós-graduado en Filosofía Contemporánea;
Pós-graduado en Investigación en História da Arte; Graduado en Música Antiga, especialidade Frauta
de bisel; Graduado en Historia e Ciencias da Música; Graduado en Historia da Arte; Graduado en
Educación. Viveuse tamén nalgunhas outras trituradoras de carne que coas súas lambedelas de mamai
ursa darían forma ao organismo actual, malia que, por ineptitude, incapacidade, ou porque a carne non
aguentou, o certificado non foi expedito. E hai mais, muito mais, non é unha particularidade propria,
acontece o mesmo a calquera forma-de-vida nestes ámbitos. Cursos de instrumento, profesoras, algún
concurso, mais universidade. É un xogo engrazado, unha brincadeira que non debe ser levada muito a
serio. E así, poderiamos dicer:
no campo da interpretación musical as áreas de interese principais están, por unha parte, na
produción estritamente contemporánea; por outra, no amplo espazo da música anterior a 1800, con
proxectos desde o repertorio medieval até o Empfindsamer Stil. Con iniciativas proprias ou en
colaboración con outros grupos realízanse concertos por todo o continente europeu, desde as Illas
Británicas até a Turquia.
No campo da investigación as áreas de acción localízanse sobretudo en tres disciplinas distintas,
a saber: análise e estética musical; a filosofía que segue às do acontecimento e da diferenza; e os
procesos de subjectivización nas artes visuais, nomeadamente a produción do sexo e do género.
Ou poderiamos dicer:
toca nietzscheana gaita de fole, anda a volta do conceito, persegue a obra de arte do lado do
acontecimento.
